Калі вашыя продкі жылі на тэрыторыі Заходняй Беларусі ў міжваенны пэрыяд, зьвярніце ўвагу на дакумэнты польскага часу, асабліва на сьпісы выбарцаў у Сейм Польшчы за 1935 і 1938 гады.
Гэта дадатковая крыніца для генэалягічнага пошуку, пра якую ведаюць далёка ня ўсе.
Што можна знайсьці?
У залежнасьці ад канкрэтнага дакумэнту ў сьпісах сустракаюцца:
- прозьвішча і імя;
- дата або год нараджэньня;
- прафэсія;
- месца жыхарства.
Па такіх запісах можна ўсталяваць, што чалавек жыў у пэўным населеным пункце ў 1930-я гады, а потым працягнуць пошук па іншых архіўных крыніцах.
Важна ўлічваць: гэта не перапіс насельніцтва. У сьпісы траплялі людзі, якія мелі права ўдзельнічаць у выбарах, таму далёка ня ўсе жыхары вёскі ці места будуць там указаныя.
Дзе шукаць дакумэнты польскага пэрыяду?
Дакумэнты 1919–1939 гадоў па тэрыторыях, што ўвайшлі ў склад міжваеннай Польшчы, варта шукаць у наступных архівах Беларусі.
1. Берасьцейскі абласны архіў
Дакумэнты па Палескім ваяводзтве, у тым ліку матэрыялы па асобных паветах Берасьцейскай, Пінскай, Кобрынскай і іншых тэрыторый.
2. Горадзенскі абласны архіў
Дакумэнты па асобных тэрыторыях Беластоцкага і Наваградзкага ваяводзтваў, у тым ліку па Горадні, Наваградку і некаторых паветах.
3. Занальны дзяржаўны архіў у Маладэчне
Дакумэнты па тэрыторыях Віленскага ваяводзтва і асобных частках Наваградзкага ваяводзтва, у тым ліку матэрыялы па Валожынскім павеце.
Захаванасьць дакумэнтаў залежыць ад канкрэтнай мясцовасьці, павету, году і выбарчай акругі. Перад замовай пошуку варта ўдакладніць, ці захаваліся сьпісы менавіта па патрэбным населеным пункце. Зьвесткі пра склад фондаў і захаваныя сьпісы прыведзеныя таксама ў даведачным матэрыяле пра польскія выбарчыя дакумэнты.
Як шукаць свайго продка?
- Вызначце населены пункт, дзе жыла сям’я ў 1930-я гады.
- Удакладніце, да якога ваяводзтва і павету ён адносіўся.
- Знайдзіце архіў, у якім могуць захоўвацца сьпісы за 1935 або 1938 год.
- Праверце прозьвішча, варыянты яго напісаньня, імёны сваякоў і адрасы.
- Супастаўце знойдзеныя зьвесткі з мэтрыкамі, перапісамі, дакумэнтамі пра нараджэньне і шлюб.
Парада: калі ў сьпісе выявіўся адзін прадстаўнік сям’і, праверце, ці не жылі побач іншыя сваякі. Часам такія дакумэнты дапамагаюць аднавіць сямейныя сувязі і вызначыць, дзе шукаць наступныя пакаленьні.
Не абмяжоўвайцеся мэтрычнымі кнігамі і савецкімі перапісамі. Дакумэнты польскага пэрыяду таксама могуць стаць важнай часткай вашай радаслоўнай.
Heritavia
У генэалягічным дасьледаваньні мы супастаўляем архіўныя крыніцы розных пэрыядаў: мэтрыкі, сьпісы, дакумэнты пра зямлю і сям’ю, мапы і адміністрацыйную гісторыю населеных пунктаў.
Сьпісы выбарцаў 1930-х — адзін са спосабаў «зачапіць» продка ў Заходняй Беларусі і працягнуць пошук далей.